پاک فضائیہ کا افغانستان میں بڑا حملہ، ننگرہار ایمونیشن ڈیپو تباہ

پاکستانی فضائیہ نے افغانستان میں کارروائی کرتے ہوئے ننگرہار کے اندر ایک بڑا ایمونیشن ڈیپو تباہ کر دیا ہے۔ سکیورٹی ذرائع کے مطابق حملے کا سلسلہ جاری ہے اور مزید اہداف نشانہ بنائے جا رہے ہیں۔

واضح رہے کہ یہ کارروائی پاک افغان سرحد پر افغان طالبان رجیم کی بلااشتعال فائرنگ اور حملوں کے ردعمل میں کی گئی ہے۔ سکیورٹی ذرائع کے مطابق پاکستانی سکیورٹی فورسز نے جوابی کارروائی کے دوران افغان طالبان کے متعدد ٹھکانے تباہ کر دیے ہیں، جس کے نتیجے میں خوارج بھاگ کھڑے ہوئے۔

ذرائع نے بتایا کہ کرم سیکٹر کے قریب بھی طالبان کے کئی ٹھکانے تباہ کیے گئے اور 8 مزید طالبان جنگجو ہلاک ہوئے۔ اب تک کی مصدقہ اطلاعات کے مطابق مجموعی طور پر تقریبا 44 افغان طالبان ہلاک ہو چکے ہیں۔

تجزیہ کاروں کے مطابق اس طرح کی فضائی کارروائیاں نہ صرف سرحدی سلامتی کے لیے اہم ہیں بلکہ خطے میں کشیدگی اور ممکنہ تصادم کے خطرات کو بھی بڑھا سکتی ہیں۔ پاک افغان سرحد پر جاری کشیدگی کے پیش نظر دونوں ممالک کی افواج کے درمیان احتیاطی اور متوازن رویہ زیادہ اہمیت رکھتا ہے۔