پاکستان کرکٹ ٹیم کے سابق کپتان اور تجربہ کار آل راؤنڈر شعیب ملک نے ٹیسٹ کرکٹ میں ملکی کارکردگی سدھارنے کے لیے ڈومیسٹک ریڈ بال ڈھانچے میں بنیادی اصلاحات کی تجویز پیش کی ہے۔ ان کے مطابق ریڈ بال کے ماہر کھلاڑیوں کو مالی طور پر محفوظ کیا جائے، تاکہ وہ طویل فارمیٹ کرکٹ سے جڑے رہیں اور فرنچائز لیگز کا دباؤ انہیں اس سے دور نہ کر سکے۔

شعیب ملک نے سوشل میڈیا پلیٹ فارم ‘ایکس’ پر اپنی رائے کا اظہار کرتے ہوئے کہا کہ پی سی بی کو ریڈ بال اسپیشلسٹس کے لیے پرکشش سینٹرل کنٹریکٹس متعارف کرانے چاہئیں۔ ان کا موقف ہے کہ جب کھلاڑیوں کو مالی تحفظ ملے گا، تو وہ فرسٹ کلاس کرکٹ میں زیادہ سنجیدگی سے حصہ لیں گے اور اپنی فطری کھیلنے کی صلاحیت کو کسی دوسرے فارمیٹ کی نذر نہیں کریں گے۔

پاکستان کے لیے 287 ون ڈے، 35 ٹیسٹ اور 124 ٹی ٹوئنٹی میچز کھیلنے والے شعیب ملک کا کہنا ہے کہ ہر سیزن میں کم از کم پانچ فرسٹ کلاس میچ کھیلنا لازمی قرار دیا جائے، تاکہ کھلاڑی ریڈ بال کے تقاضوں سے ہمیشہ ہم آہنگ رہیں۔ انہوں نے زور دیا کہ ڈومیسٹک اور انٹرنیشنل ٹیسٹ کرکٹ کے معیار میں جو خلیج پیدا ہوئی ہے، اسے پُر کرنا اب ضروری ہو گیا ہے۔

انہوں نے کہا: "بین الاقوامی سطح پر آدھی تیاری کے ساتھ کامیابی ممکن نہیں۔ ہمیں مکمل طور پر تیار اور پرعزم کھلاڑی چاہئیں۔” شعیب ملک کے مطابق فرنچائز کرکٹ کی کشش کو غلط نہیں کہا جا سکتا، لیکن نظام ایسا ہونا چاہیے کہ ٹیسٹ فارمیٹ مالی اور پیشہ ورانہ لحاظ سے بھی سود مند لگے۔

یاد رہے کہ شعیب ملک کی یہ تجاویز ایسے وقت آئی ہیں جب پاکستان کو شان مسعود کی قیادت میں بنگلا دیش کے خلاف دو میچوں کی ٹیسٹ سیریز میں صفر کے مقابلے دو سے شکست ہوئی اور وائٹ واش کا سامنا کرنا پڑا۔ اس نتیجے نے پاکستان کرکٹ کے حلقوں میں ڈومیسٹک ڈھانچے پر ازسرنو غور کی ضرورت کو اور بھی واضح کر دیا ہے۔