وزیراعظم شہباز شریف کا مکہ دفاعی معاہدے پر اظہار مسرت، فیلڈ مارشل عاصم منیر کی خدمات کو خراجِ تحسین۔

اپنے بھائی محمد بن سلمان اور طیب اردوان کے ساتھ معاہدے پر دستخط کرنا اعزاز ہے، وزیراعظم شہباز شریف

وزیراعظم شہباز شریف نے پاکستان، سعودی عرب اور ترکیہ کے درمیان طے پانے والے مکہ مشترکہ دفاعی معاہدے کا خیرمقدم کرتے ہوئے کہا ہے کہ اپنے بھائی محمد بن سلمان اور طیب اردوان کے ساتھ اس معاہدے پر دستخط کرنا ان کے لیے اعزاز کی بات ہے۔

اپنے بیان میں وزیراعظم نے کہا کہ تینوں برادر اسلامی ممالک امن و سلامتی کے مشترکہ عزم پر متحد ہیں۔ ان کا کہنا تھا کہ مکہ مشترکہ دفاعی معاہدہ حرمین شریفین کے سائے میں طے پایا ہے اور یہ معاہدہ آئندہ نسلوں کے لیے امن کی ڈھال ثابت ہوگا۔ وزیراعظم نے مزید کہا کہ یہ معاہدہ امتِ مسلمہ کے امن اور خوشحالی کا ذریعہ بنے گا۔

وزیراعظم شہباز شریف نے فیلڈ مارشل عاصم منیر کی خدمات کو بھی خراجِ تحسین پیش کیا۔ انہوں نے کہا کہ فیلڈ مارشل عاصم منیر کی انتھک کاوشیں اس معاہدے کے حصول میں اہم رہیں۔

خیال رہے کہ مکہ مکرمہ میں سعودی عرب، پاکستان اور ترکیہ کے سربراہان کا مشترکہ دفاعی اجلاس ہوا تھا، جس میں تینوں ممالک کے درمیان دوطرفہ و سہ فریقی تعلقات، علاقائی سلامتی اور دفاعی تعاون پر تفصیلی بات چیت کی گئی۔ اجلاس کے بعد وزیراعظم شہباز شریف، سعودی ولی عہد محمد بن سلمان اور ترک صدر رجب طیب اردوان نے مکہ مشترکہ دفاعی معاہدے پر دستخط کیے۔