پاکستان اسٹاک ایکسچینج میں شدید مندی، سرمایہ کاروں میں تشویش

📍 کراچی

پاکستان اسٹاک ایکسچینج میں کاروبار کے دوران منفی رجحان دیکھنے میں آ رہا ہے، جہاں کاروباری ہفتے کے پہلے روز ہی مارکیٹ دباؤ کا شکار ہو گئی۔

آج ابتدائی لمحات سے ہی پی ایس ایکس 100 انڈیکس میں کمی کا سلسلہ جاری رہا اور ایک موقع پر انڈیکس 2242 پوائنٹس کی بڑی گراوٹ کے بعد 177,360 پوائنٹس کی سطح پر آ گیا۔

اب تک کے کاروبار کے دوران پی ایس ایکس 100 انڈیکس میں 2.25 فیصد کمی ریکارڈ کی جا چکی ہے، جس کے باعث سرمایہ کاروں میں بے چینی پائی جا رہی ہے۔

یاد رہے کہ گزشتہ کاروباری ہفتے میں بھی مارکیٹ دباؤ کا شکار رہی تھی، جہاں 100 انڈیکس 4525 پوائنٹس کی کمی کے بعد 179,603 پوائنٹس پر بند ہوا تھا۔

اعداد و شمار کے مطابق گزشتہ ہفتے کے دوران:

• 100 انڈیکس 7413 پوائنٹس کے بینڈ میں رہا
• 4.31 ارب شیئرز کے سودے طے پائے
• 212 ارب روپے کا کاروبار ہوا
• مارکیٹ کیپٹلائزیشن 523 ارب روپے کم ہو کر 20,359 ارب روپے رہ گئی

ماہرین کے مطابق سیاسی و معاشی غیر یقینی صورتحال اور سرمایہ کاروں کا محتاط رویہ مارکیٹ پر دباؤ کا باعث بن رہا ہے۔