ایران امریکا رابطوں میں فیلڈ مارشل عاصم منیر کا اہم کردار، معاملات درست سمت میں ہیں: وزیراعظم شہباز شریف

وزیراعظم شہباز شریف نے بیجنگ میں کہا ہے کہ فیلڈ مارشل سید عاصم منیر نے ایرانی اور امریکی قیادت کے درمیان رابطوں میں نہایت اہم کردار ادا کیا ہے اور ایران امریکا مذاکرات کے معاملات درست سمت میں آگے بڑھ رہے ہیں۔

بیجنگ کے عظیم عوامی ہال میں وزیراعظم شہباز شریف کے اعزاز میں ایک پروقار استقبالیہ تقریب منعقد کی گئی۔ چینی وزیراعظم لی چیانگ نے اپنے پاکستانی ہم منصب کا پرتپاک خیرمقدم کیا اور چین کی مسلح افواج کے چاق و چوبند دستوں نے گارڈ آف آنر پیش کیا۔

تقریب سے خطاب کرتے ہوئے وزیراعظم نے کہا کہ چین کا دورہ ہمیشہ میرے لیے خوشی کا باعث ہوتا ہے۔ ہر بار یہاں آکر نئی تعمیرات اور ترقی کا مشاہدہ ہوتا ہے۔ انھوں نے کہا کہ پاکستان اور چین اپنی دوستی اور سفارتی تعلقات کا 75واں سال منا رہے ہیں۔ یہ دوستی بانی رہنماؤں کی قائم کی ہوئی ہے اور اب ہم اس ورثے کو آگے بڑھا رہے ہیں۔

خطے کی صورتحال پر بات کرتے ہوئے شہباز شریف نے کہا کہ دنیا اس وقت ایک نازک دور میں ہے اور خلیجی خطے میں بحران موجود ہے۔ پاکستان نے امریکا اور ایران کے درمیان ثالثی میں مخلصانہ کردار ادا کیا ہے۔ فیلڈ مارشل عاصم منیر ابھی تہران سے واپس آئے ہیں۔ وہ اس اہم دورے کو چھوڑنا نہیں چاہتے تھے، رات بھر سفر میں رہے اور اس ملاقات میں شرکت کی۔ وزیراعظم نے مزید کہا کہ دونوں فریقوں کے درمیان معاملات اب درست سمت میں بڑھ رہے ہیں۔

وزیراعظم نے امن اور جنگ بندی کی کوششوں کی حمایت پر صدر شی جن پنگ اور چینی قیادت کا شکریہ ادا کیا اور صدر شی کے چار نکاتی ایجنڈے کی بھرپور حمایت کا اعلان کیا۔

چینی وزیراعظم کا موقف

چینی وزیراعظم لی چیانگ نے اس موقع پر کہا کہ پاکستان نے خطے میں مثبت کردار ادا کیا ہے اور مشترکہ مفادات کا تحفظ یقینی بنایا ہے۔ انھوں نے بتایا کہ صدر شی جن پنگ کی وزیراعظم شہباز شریف سے ملاقات ہوگی جو دوطرفہ تعلقات کو مزید مستحکم کرنے کے لیے اسٹریٹجک رہنمائی فراہم کرے گی۔

انھوں نے کہا کہ چین پاکستان کے ساتھ مل کر کام کرنے، روایتی دوستی کو آگے بڑھانے اور دوطرفہ تعاون کے فروغ کے لیے پرعزم ہے۔