بہاولپور میں منکی پاکس پھیلنے لگا علاج کرنے والی نرس بھی متاثر

بہاولپور: منکی پاکس کے تین کیسز، آئسولیشن وارڈ کی نرس بھی وائرس کی زد میں

بہاولپور میں منکی پاکس کے تین کیسز کی تصدیق ہو گئی ہے۔ تینوں متاثرین بہاول وکٹوریہ ہسپتال کے آئسولیشن وارڈ میں طبی نگرانی میں ہیں، جبکہ ان کی دیکھ بھال پر مامور ایک نرس بھی اس وائرس کا شکار ہو گئی ہے۔

اسپتال ذرائع کے مطابق تینوں مریضوں کو بیرون ملک سے آنے والے رشتہ داروں کے ذریعے وائرس منتقل ہوا۔ انہیں فوری طور پر آئسولیشن وارڈ منتقل کر کے علاج شروع کر دیا گیا۔

نرس کا معاملہ زیادہ سنگین نوعیت کا ہے، کیونکہ وہ ڈیوٹی کے دوران متاثرہ مریض کے براہِ راست رابطے میں رہی۔ ذرائع کے مطابق نرس بھی اب طبی نگرانی میں ہے۔

صحت حکام کی جانب سے ابھی تک کوئی باضابطہ بیان سامنے نہیں آیا، تاہم ہسپتال انتظامیہ نے احتیاطی تدابیر سخت کر دی ہیں۔ شہریوں کو ہدایت کی جاتی ہے کہ کسی بھی مشکوک علامت کی صورت میں قریبی صحت مرکز سے فوری رابطہ کریں۔