اہم ترین پاکستان قومی اسمبلی میں خواجہ آصف کا کہنا تھا کہ معاہدے میں پاکستان کا کردار قیادت کی تین سالہ محنت کا نتیجہ ہے News Deskجون 15, 202605 مشاهدات امریکا ایران معاہدہ: پاکستان کو 78 برسوں میں اتنا بڑا اعزاز نصیب نہیں ہوا، خواجہ آصف وزیر دفاع خواجہ آصف نے کہا ہے کہ جمعہ کو امریکا اور ایران کے درمیان مفاہمت کی یادداشت پر دستخط ہو جائیں گے، اور اس معاہدے میں پاکستان کا کردار ایسا اعزاز ہے جو ملک کو گزشتہ 78 برسوں میں نصیب نہیں ہوا۔ قومی اسمبلی کے اجلاس سے خطاب کرتے ہوئے وزیر دفاع کا کہنا تھا کہ وزیراعظم، فیلڈ مارشل اور ان کی ٹیم نے گزشتہ تین برسوں میں جو محنت کی، یہ معاہدہ اسی کا ثمر ہے۔ ان کے مطابق ایک نازک اور حساس مسئلے کو پاکستانی قیادت نے انتہائی مہارت سے حل کیا۔ خواجہ آصف نے ایک سال قبل کی جنگ کا حوالہ بھی دیا اور کہا کہ اس میں اللہ تعالیٰ نے پاکستان کو فتح سے سرفراز کیا، جبکہ معاشی میدان میں جاری جنگ میں بھی کامیابی کی توقع ہے۔ وزیر دفاع نے قوم سے اتحاد کی اپیل کی اور کہا کہ جس طرح پوری قوم بھارت کے خلاف یکجا ہوئی تھی، اسی طرح دہشت گردی کے خلاف بھی صف بندی ضروری ہے۔ انہوں نے ایرانی بھائیوں کو مبارکباد دی اور امن کے لیے کردار ادا کرنے پر امریکی قیادت کا شکریہ ادا کیا۔ ان کے بقول اگر امت مسلمہ نے اتحاد کا مظاہرہ کیا تو فلسطین کا مسئلہ بھی پرامن طور پر حل ہو سکتا ہے۔