وزیراعظم شہباز شریف کا ایرانی صدر سے ٹیلیفونک رابطہ، تاریخی امن معاہدے پر مبارکباد اور ثالثی کا شکریہ
وزیراعظم شہباز شریف اور ایرانی صدر ڈاکٹر مسعود پزشکیان کے درمیان اہم ٹیلیفونک رابطہ ہوا۔ وزیراعظم آفس کے اعلامیے کے مطابق یہ اسلام آباد امن معاہدے پر دستخط کے بعد دونوں رہنماؤں کا پہلا براہِ راست رابطہ تھا جو تیس منٹ سے زائد جاری رہا۔
وزیراعظم شہباز شریف نے صدر پزشکیان، ایرانی قیادت اور عوام کو تاریخی معاہدے پر دستخط کی مبارکباد دیتے ہوئے کہا کہ یہ معاہدہ خطے میں پائیدار امن کے قیام میں مددگار ثابت ہوگا۔ انہوں نے کہا کہ اس سمجھوتے سے ایرانی قوم کی تعمیرِنو کا راستہ بھی ہموار ہوگا اور پاک ایران دوطرفہ تعلقات کو مزید گہرائی ملے گی۔
وزیراعظم نے ایران کے سپریم لیڈر آیت اللہ سید مجتبیٰ حسینی خامنہ ای کے لیے پرتپاک احترام اور نیک تمناؤں کا اظہار کیا۔ انہوں نے ایرانی قیادت کے امن معاہدے پر دستخط کے فیصلے کو خراجِ تحسین پیش کرتے ہوئے مذاکرات کے آئندہ مرحلے میں بھی کامیابی کی دعا کی۔
اعلامیے کے مطابق صدر مسعود پزشکیان نے وزیراعظم شہباز شریف اور فیلڈ مارشل سید عاصم منیر کا خصوصی شکریہ ادا کیا۔ ایرانی صدر نے کہا کہ دونوں شخصیات نے انتہائی مہارت، اخلاص اور دانشمندی سے ثالثی کے عمل کو کامیاب بنانے میں نمایاں کردار ادا کیا۔ انہوں نے کہا کہ مشکل وقت میں پاکستان کی مثبت اور مخلصانہ حمایت کو ایران کبھی نہیں بھولے گا۔
ایرانی صدر نے پاکستانی عوام کے لیے نیک خواہشات کا اظہار کرتے ہوئے واضح کیا کہ ایران تمام شعبوں میں پاکستان کے ساتھ دوطرفہ تعلقات کو مزید فروغ دینے کا خواہاں ہے۔ دونوں رہنماؤں نے باہمی سہولت کے مطابق جلد ایک دوسرے کے دارالحکومتوں کا دورہ کرنے اور آئندہ دنوں میں بھی مسلسل رابطے میں رہنے پر اتفاق کیا۔
