کراچی میں دہشت گردی کا بڑا منصوبہ ناکام، کالعدم بی ایل اے کے دو دہشت گرد گرفتار
کراچی میں سی ٹی ڈی اور حساس اداروں نے مشترکہ کارروائی کر کے دہشت گردی کا بڑا منصوبہ ناکام بنا دیا۔ انٹیلی جنس بیسڈ آپریشن میں کالعدم تنظیم بی ایل اے سے تعلق رکھنے والے دو تربیت یافتہ دہشت گرد گرفتار کر لیے گئے۔
حکام کے مطابق گرفتار ملزمان نے ریکی اور کمیونیکیشن کی خصوصی تربیت حاصل کر رکھی تھی۔ وہ شہر میں حساس تنصیبات سے متعلق معلومات اکٹھی کر کے دہشت گرد تنظیم تک پہنچا رہے تھے۔
گرفتار افراد کی شناخت مجاہد بلوچ اور فرید بلوچ کے نام سے ہوئی ہے۔ ان کے قبضے سے چار کلو گرام بارودی مواد، ڈیٹونیٹر، پرائما کارڈ اور دیگر متعلقہ سامان برآمد کیا گیا۔
سی ٹی ڈی حکام کا کہنا ہے کہ برآمد ہونے والا بارودی مواد دہشت گردی کی کارروائیوں میں استعمال کے لیے رکھا گیا تھا۔ ملزمان کے خلاف مقدمات درج کر لیے گئے ہیں اور معاملے کی مزید تفتیش جاری ہے۔
