خطے میں کشیدگی میں شدت، متعدد ممالک میں فضائی حملے اور انٹرسیپشن کارروائیاں

ایران کے قطر، شام، کویت اور بحرین میں امریکی تنصیبات پر حملے

ایران کی پاسداران انقلاب فورس نے دعویٰ کیا ہے کہ اس نے شام کے علاقے تنف میں امریکی افواج کے کمانڈ سینٹر کو نشانہ بنایا ہے۔ فورس کی جانب سے جاری بیان کے مطابق یہ کارروائی ایران شہر میں ہونے والے حملوں میں فوجیوں کی ہلاکت کے ردعمل میں کی گئی۔

بیان میں بتایا گیا کہ پاسداران انقلاب کی فضائی افواج نے تنف میں قائم امریکی سپیشل آپریشنز کمانڈ سینٹر پر حملہ کیا، جس کے نتیجے میں ایک ریڈار سسٹم اور کئی خصوصی ہیلی کاپٹر نشانہ بنے جبکہ متعدد امریکی اہلکار بھی زد میں آئے۔

قطر کی وزارتِ داخلہ نے بتایا کہ جمعے کی صبح ملک پر ایرانی حملے کے دوران ایک بچہ ملبہ لگنے سے زخمی ہوا ہے۔ وزارت کے مطابق ملکی مسلح افواج اس وقت متعدد فضائی حملوں کو ناکام بنانے میں مصروف ہیں۔ ابتدائی تحقیقات سے معلوم ہوا کہ زخمی بچے کو انٹرسیپشن آپریشن کے دوران گرنے والے ملبے سے چوٹ آئی، جسے فوری طبی امداد فراہم کی جا رہی ہے۔

کویت کی وزارتِ دفاع نے کہا ہے کہ اس کی افواج ایرانی میزائلوں اور ڈرونز کا مقابلہ کر رہی ہیں۔ وزارت کے بیان کے مطابق ملک بھر میں سنائی دینے والی بلند آوازیں دراصل انٹرسیپشن کارروائیوں کا نتیجہ ہیں۔ اس سے قبل کویت نے ایرانی میزائلوں اور ڈرونز کی نشاندہی کی تصدیق کی تھی، اور تباہ کیے گئے میزائلوں کے ملبے سے کچھ نقصان پہنچنے کی بات بھی سامنے آئی، تاہم مزید تفصیلات جاری نہیں کی گئیں۔

ایران کی جانب سے امریکی فوجی اڈوں کو نشانہ بنانے کے اعلان کے بعد بحرین میں خطرے کے سائرن بجنا شروع ہو گئے۔ بحرین کی وزارتِ داخلہ نے شہریوں سے پرسکون رہنے اور قریبی محفوظ مقامات کی جانب منتقل ہونے کی اپیل کی ہے۔

اس سے پہلے تسنیم خبر رساں ادارے نے اطلاع دی تھی کہ ایرانی فوج نے بحرین کے صخر ایئر بیس پر امریکی ہیلی کاپٹروں اور جاسوس طیاروں کو نشانہ بنایا ہے۔