پنجاب میں بلدیاتی انتخابات کب ہوں گے؟ مجوزہ شیڈول سامنے آگیا

الیکشن کمیشن نے مجوزہ شیڈول چیف سیکریٹری پنجاب کو بھیج دیا، پولنگ 14 دسمبر کو متوقع

الیکشن کمیشن آف پاکستان نے پنجاب میں بلدیاتی انتخابات کا مجوزہ شیڈول چیف سیکریٹری پنجاب کو ارسال کر دیا ہے۔ اس شیڈول کے مطابق صوبے بھر میں بلدیاتی انتخابات کے لیے پولنگ 14 دسمبر کو ہوگی۔

مجوزہ شیڈول کے تحت امیدوار 27 سے 30 اکتوبر تک کاغذاتِ نامزدگی جمع کرا سکیں گے۔ اس کے بعد 2 سے 5 نومبر تک ان کاغذات کی جانچ پڑتال کی جائے گی۔

انتخابی عمل کے اگلے مرحلے میں 19 نومبر کو امیدواروں کی حتمی فہرست آویزاں کی جائے گی، جبکہ 20 نومبر کو انہیں انتخابی نشانات الاٹ کیے جائیں گے۔ انتخابی نشانات ملنے کے بعد امیدواروں کو انتخابی مہم کے لیے تقریباً تین ہفتے ملیں گے۔

یہ شیڈول ابھی مجوزہ ہے۔ چیف سیکریٹری پنجاب کی جانب سے اس پر رائے یا منظوری کے بعد ہی تاریخوں کا حتمی اعلان کیا جائے گا۔