سندھ کے 9 اضلاع میں ضمنی بلدیاتی انتخابات، حیدرآباد میں پیپلزپارٹی اور آزاد امیدوار کامیاب
سندھ کے 9 اضلاع میں 13 نشستوں پر ہونے والے ضمنی بلدیاتی انتخابات میں حیدرآباد کی ایک نشست پیپلزپارٹی اور دوسری آزاد امیدوار نے اپنے نام کر لی۔ غیر سرکاری اور غیر حتمی نتائج کے مطابق مجموعی طور پر پولنگ کا عمل پر امن رہا۔
اتوار کو حیدرآباد، جامشورو، دادو، سجاول، سکھر، گھوٹکی، نوشہروفیروز، میرپورخاص اور جیکب آباد میں پولنگ صبح 8 بجے شروع ہوئی اور شام 4 بجے اختتام پذیر ہوئی۔ حیدرآباد میں ٹاؤن میونسپل کارپوریشن پریٹ آباد کی دو یونین کونسلوں میں چیئرمین اور جنرل وارڈ ممبر کی نشستوں پر مقابلہ ہوا۔
یو سی 43 میں چیئرمین کی نشست پر آزاد امیدوار محمد علی شیخ نے 960 ووٹ حاصل کر کے کامیابی حاصل کی، جبکہ یو سی 49 کے وارڈ ممبر ٹو کی نشست پر پیپلزپارٹی کے امیدوار عالم خان 335 ووٹ لے کر فاتح قرار پائے۔
دیگر اضلاع سے آنے والے نتائج میں سکھر کی یو سی نصیرآباد سے وائس چیئرمین کی نشست پیپلزپارٹی کے امیدوار نے جیتی۔ جیکب آباد اور سیہون میں بھی پیپلزپارٹی کامیاب رہی، پنو عاقل کی نشست جمعیت علمائے اسلام (ف) نے حاصل کی، جبکہ میرپورخاص کی دو نشستوں پر آزاد امیدوار سبقت لے گئے۔
یہ نتائج ابھی غیر سرکاری اور غیر حتمی ہیں، حتمی اعداد و شمار الیکشن کمیشن کی جانب سے باضابطہ طور پر جاری کیے جائیں گے۔
—
ویب ڈیسک — 18 مئی 2025