اسلام آباد / مظفرآباد:
پاکستان سمیت دنیا بھر میں مقیم کشمیری آج یومِ حقِ خودارادیت منا رہے ہیں۔ اس دن کی مناسبت سے آزاد کشمیر کے دارالحکومت مظفرآباد سمیت مختلف شہروں میں ریلیاں، مظاہرے اور احتجاجی سرگرمیاں منعقد کی گئیں۔
شدید سردی کے باوجود مظفرآباد کے آزادی چوک پر رات گئے مشعل بردار ریلی نکالی گئی، جس میں کشمیری عوام نے بھارتی مظالم کے خلاف شدید احتجاج کیا اور اقوامِ متحدہ کی قراردادوں پر عملدرآمد کا مطالبہ کیا۔
واضح رہے کہ 5 جنوری 1949 کو اقوامِ متحدہ کی سلامتی کونسل نے ایک تاریخی قرارداد منظور کی تھی، جس کے تحت کشمیری عوام کو اپنے مستقبل کا فیصلہ خود کرنے کا حق دیا گیا تھا۔ تاہم بھارت کی جانب سے مقبوضہ کشمیر پر غیر قانونی قبضے اور مسلسل جبر و تشدد کے باعث یہ وعدہ آج تک پورا نہ ہو سکا۔
وزیراعظم شہباز شریف نے یومِ حقِ خودارادیت کے موقع پر اپنے پیغام میں کہا کہ
“5 جنوری 1949 کو اقوام متحدہ کے کمیشن برائے بھارت و پاکستان نے تاریخی قرارداد منظور کی، جس میں ریاست جموں و کشمیر کے مستقبل کا فیصلہ آزادانہ اور غیر جانبدارانہ رائے شماری کے ذریعے کرنے کا عہد کیا گیا تھا۔”
وزیراعظم نے کہا کہ مقبوضہ کشمیر کے عوام گزشتہ آٹھ دہائیوں سے بھارتی قابض افواج کے مظالم کا سامنا کر رہے ہیں، تاہم بھارتی جبر کشمیری عوام کے حوصلے اور عزم کو توڑنے میں ناکام رہا ہے۔
انہوں نے عالمی برادری سے مطالبہ کیا کہ وہ بھارت کے جابرانہ اقدامات کا نوٹس لے اور کشمیری عوام کو ان کا جائز حق دلانے کے لیے مؤثر اقدامات کرے۔