آبنائے ہرمز سے تمام بارودی سرنگیں ہٹا دی گئیں، امریکی صدر کا دعویٰ
امریکی صدر ڈونلڈ ٹرمپ نے دعویٰ کیا ہے کہ آبنائے ہرمز سے تمام بارودی سرنگیں مکمل طور پر ہٹا دی گئی ہیں اور یہ اہم آبی گزرگاہ اب پوری طرح کھلی ہے۔
ان کا کہنا تھا کہ متعدد بحری جہاز اس وقت آبنائے ہرمز سے بحفاظت گزر رہے ہیں، جبکہ امریکی بحریہ اس علاقے پر مکمل کنٹرول رکھتی ہے۔ ڈونلڈ ٹرمپ کے مطابق کسی بھی جہاز کو گزرنے میں کوئی رکاوٹ درپیش نہیں۔
امریکی صدر نے ایران کی جانب سے حالیہ مہینوں میں ہونے والے مظاہروں کا بھی ذکر کیا۔ انہوں نے کہا کہ ان مظاہروں میں 52 ہزار سے زائد افراد ہلاک ہوئے، اور ایران کو ان اموات کی ذمہ داری قبول کرتے ہوئے متاثرہ خاندانوں کو مالی معاوضہ ادا کرنا چاہیے۔
ٹرمپ نے واضح انداز میں کہا کہ ایران کو اپنے اقدامات کا حساب دینا ہوگا اور بین الاقوامی برادری اس معاملے پر گہری نظر رکھے ہوئے ہے۔ آبنائے ہرمز خطے کی اہم ترین تجارتی گزرگاہوں میں شمار ہوتی ہے، جہاں سے دنیا کی ایک بڑی مقدار میں تیل کی ترسیل ہوتی ہے، اسی لیے اس کی سلامتی سے متعلق ہر بیان عالمی منڈیوں پر اثر انداز ہو سکتا ہے۔