مچل مارش: پاکستان آ کر خوشی ہوئی، ورلڈکپ کی تیاری کیلئے اہم سیریز

لاہور: آسٹریلیا کے کپتان مچل مارش نے کہا ہے کہ پاکستان آ کر خوشی ہو رہی ہے اور یہ سیریز ورلڈکپ کی تیاری کے لیے بہت اہم ہے۔ انہوں نے بتایا کہ پاکستان کی فاسٹ بالرز کی تاریخ بہت بڑی ہے اور خاص طور پر شاہین آفریدی ہمارے لیے بڑا چیلنج ہوں گے۔

مچل مارش نے کہا کہ یہاں کے موسم کا اندازہ پہلے نہیں تھا اس لیے زیادہ گرم کپڑے نہیں لائے، تاہم ورلڈکپ کی تیاری کے لیے یہ سیریز اہم ہے۔ انہوں نے مزید کہا کہ کچھ کھلاڑی اس سیریز میں شامل نہیں ہوئے لیکن امید ہے وہ ہمیں سری لنکا میں جوائن کریں گے۔

انہوں نے پاکستانی کپتان بابر اعظم کی تعریف کرتے ہوئے کہا کہ وہ طویل عرصے سے بہترین کھلاڑیوں میں شمار ہوتے ہیں اور ہم ان کا احترام کرتے ہیں۔ پلیئنگ الیون کے حوالے سے حتمی فیصلہ کل کیا جائے گا۔ مچل مارش نے کہا کہ آسٹریلوی ٹیم اسپنرز کے خلاف کنڈیشن دیکھ کر اٹیک کرنے کی کوشش کرے گی، کیونکہ یہ کنڈیشن آسان نہیں ہیں۔

پاکستانی کپتان سلمان علی آغا نے میڈیا سے گفتگو کرتے ہوئے کہا کہ جہاں کنڈیشن سازگار ہوتی ہے وہاں ٹیم نے 200 سے زائد اسکور کیے ہیں، لیکن جہاں کنڈیشن مشکل ہوتی ہے وہاں بڑا اسکور کرنا آسان نہیں۔ انہوں نے کہا کہ ٹی ٹوئنٹی میں کوئی ٹیم آسان نہیں ہوتی اور آسٹریلیا کے خلاف سیریز بہت اہم ہے۔

سلمان علی آغا نے کہا کہ شائقین ٹیم سے بہت توقعات رکھتے ہیں اور ہمارے فینز جذباتی ہیں۔ اگر ٹیم اچھی پرفارمنس دیتی ہے تو پیار ملتا ہے اور اگر پرفارم نہیں کر پاتے تو ناراض بھی ہوتے ہیں۔ انہوں نے کہا کہ اگر ہم اچھا کھیل نہیں پائیں تو فینز کا غصہ جائز ہے، اور عثمان طارق ورلڈکپ میں ہمارے لیے ٹرمپ کارڈ ثابت ہو سکتے ہیں۔