ڈائریکٹر جنرل آئی ایس پی آر لیفٹیننٹ جنرل احمد شریف چوہدری نے جامعہ دارالعلوم کراچی کا دورہ کیا، جہاں ان کی آمد پر مفتی تقی عثمانی اور دیگر جید علماء کرام نے ان کا پرتپاک استقبال کیا۔
دورے کے دوران ہونے والی ملاقات میں علماء کرام نے ملکی سلامتی اور دہشت گردی کے خلاف جنگ میں پاک فوج کے ساتھ بھرپور یکجہتی کا اظہار کیا۔ اس موقع پر علماء نے اس عزم کا اعادہ کیا کہ ملک کے دفاع اور امن کے قیام کے لیے ہر سطح پر تعاون جاری رکھا جائے گا۔
مفتی تقی عثمانی نے دہشت گردی کے خاتمے کے لیے پاک فوج کی قربانیوں اور مسلسل کوششوں کو سراہتے ہوئے کہا کہ علماء کرام اور دینی ادارے افواجِ پاکستان کے ساتھ کھڑے ہیں اور ہر ممکن تعاون کے لیے تیار ہیں۔
انہوں نے اس موقع پر اس بات پر زور دیا کہ پاکستان میں امن و استحکام کے لیے قوم اور افواج کا اتحاد ناگزیر ہے، اور دشمن عناصر کے عزائم کو ناکام بنانے کے لیے یکجہتی کا پیغام انتہائی اہم ہے۔
بعد ازاں مفتی تقی عثمانی نے نمازِ جمعہ کے بعد پاکستان کی سالمیت اور افواجِ پاکستان کی ہر محاذ پر کامیابی کے لیے خصوصی دعا بھی کی، جس میں ملک کے امن، استحکام اور سلامتی کے لیے نیک تمناؤں کا اظہار کیا گیا۔