عالمی منڈی میں سونے کی قیمت میں ایک مرتبہ پھر نمایاں کمی ریکارڈ کی گئی ہے، جس کے بعد قیمتی دھات دباؤ سے نکلنے میں ناکام دکھائی دے رہی ہے۔ تازہ ٹریڈنگ کے دوران فی اونس سونا 172 ڈالر کی بڑی کمی کے بعد 4,721 ڈالر کی سطح پر آ گیا۔ کاروباری اوقات میں سونے کی قیمت میں 3 فیصد سے زائد کمی دیکھی گئی جس نے عالمی سرمایہ کاروں کے اعتماد کو مزید متاثر کیا ہے۔
ماہرین کے مطابق ڈالر کی مضبوطی، عالمی معاشی غیر یقینی صورتحال اور سرمایہ کاروں کی جانب سے منافع خوری کے رجحان نے سونے پر دباؤ بڑھا دیا ہے، جس کے باعث محفوظ سرمایہ کاری سمجھے جانے والے اثاثے بھی شدید اتار چڑھاؤ کا شکار ہیں۔
دوسری جانب عالمی منڈی میں خام تیل کی قیمتوں میں بھی واضح گراوٹ ریکارڈ کی گئی ہے۔ عالمی سطح پر خام تیل کی قیمتیں 4 فیصد تک کم ہوئیں، جس کے نتیجے میں برینٹ خام تیل 67 ڈالر جبکہ ڈبلیو ٹی آئی خام تیل 63 ڈالر فی بیرل میں فروخت ہو رہا ہے۔
ماہرین کا کہنا ہے کہ عالمی معاشی سست روی کے خدشات، طلب میں کمی اور مالیاتی پالیسیوں سے متعلق غیر یقینی صورتحال کے باعث توانائی کی منڈی بھی دباؤ کا شکار ہے۔
