کوچ سولانو نے 23 رکنی اسکواڈ کا اعلان کیا، دو نئے چہرے پہلی بار قومی ٹیم میں شامل
مالدیپ میں ہونے والے 4 ملکی فٹبال ٹورنامنٹ کے لیے پاکستان قومی فٹبال ٹیم کا اعلان کر دیا گیا ہے۔
ہیڈ کوچ نولبرٹو سولانو نے سوشل میڈیا پر ایک ویڈیو پیغام کے ذریعے 23 رکنی اسکواڈ کا اعلان کیا۔ اس بار دو نئے چہرے بھی قومی ٹیم میں نظر آئیں گے — فارورڈ علی خان اور مڈ فیلڈر عادل نبی پہلی مرتبہ پاکستان کی نمائندگی کریں گے۔ علی خان سوئیڈن جبکہ عادل نبی برطانیہ میں لیگ فٹبال کھیلتے ہیں۔
گول کیپنگ کی ذمہ داری ثاقب حنیف، یوسف بٹ اور حسن علی سنبھالیں گے۔ دفاعی لائن میں عبداللہ اقبال، محمد فضل، عبداللہ شاہ، عیسی سلیمان، محب آفریدی، مامون موسی، علی نیازی اور حارث زیب شامل ہیں۔
مڈفیلڈ کے لیے عادل نبی، راہس نبی، عالمگیر غازی، حیان خٹک، اوٹس خان اور علی آغا کو منتخب کیا گیا ہے۔ فارورڈ لائن میں شائق دوست، عمر نواز، علی خان، ہارون حامد، علی شاہ اور صمد ارشد شامل ہیں۔
یہ ٹورنامنٹ یکم سے 10 جون 2026 تک مالدیپ میں کھیلا جائے گا۔ مقابلے میں پاکستان اور میزبان مالدیپ کے ساتھ بنگلا دیش اور افغانستان کی ٹیمیں بھی حصہ لیں گی۔