تھائی لینڈ میں ایشین بیلنس بائیک چیمپئن شپ — پاکستان کے ننھے سائیکلسٹوں نے دھوم مچا دی
تھائی لینڈ میں جاری ایشین بیلنس بائیک سائیکلنگ چیمپئن شپ میں پاکستان کے دو ننھے سائیکلسٹ اپنی عمر سے بڑی ہمت کا مظاہرہ کر رہے ہیں۔ صرف 2 اور 4 سال کی عمر کے یہ بچے ایشیا بھر کے تجربہ کار حریفوں کے سامنے بلا خوف میدان میں اترے اور پاکستان کا نام روشن کیا۔
بوائز 2 سال کیٹیگری میں محمد حسن نے 10ویں جبکہ بوائز 4 سال کیٹیگری میں احمد حسن نے 12ویں پوزیشن حاصل کی۔ یہ چیمپئن شپ اس سال ایشیا بھر کے شرکاء کے لیے کھولی گئی ہے، جس کے بعد اس کا درجہ ایک باوقار بین الاقوامی ایونٹ کا ہو گیا ہے۔ مقابلے کی سطح بلند تھی، مگر پاکستانی بچوں کی کارکردگی نے سب کی توجہ کھینچی۔
پاکستان سائیکلنگ فیڈریشن کے صدر سید اظہر علی شاہ نے دونوں بچوں کے والدین کو داد دی جنہوں نے اتنی کم عمری میں اپنے بچوں کو بین الاقوامی مقابلے میں بھیجنے کا فیصلہ کیا۔ والدین پورے ایونٹ میں بچوں کے ساتھ موجود ہیں اور انہیں بھرپور حوصلہ دے رہے ہیں۔ پاکستانی دستے کی نگرانی ہارون جنرل کر رہے ہیں جو اس مقصد کے لیے خصوصی طور پر تھائی لینڈ میں موجود ہیں۔
ان ننھے سواروں کی یہ شرکت بتاتی ہے کہ پاکستان میں نئی نسل کھیلوں، بالخصوص سائیکلنگ میں، سنجیدگی سے قدم رکھ رہی ہے۔ اگر اس ابھرتے ہوئے ٹیلنٹ کو بروقت تربیت اور سرپرستی ملے تو آنے والے برسوں میں پاکستان بین الاقوامی سائیکلنگ میں ایک مضبوط حریف بن کر ابھر سکتا ہے۔