عمان میں چار ملکی علاقائی اجلاس، آبنائے ہرمز اور باب المندب کی بحری سلامتی پر اتفاق
عمان میں چار ملکی علاقائی اجلاس میں آبنائے ہرمز اور باب المندب کی بحری سلامتی کے حوالے سے اتفاق کرلیا گیا۔ اجلاس میں پاکستان، سعودی عرب، ترکیہ اور مصر کے وزرائے خارجہ نے شرکت کی، جس میں ریاستوں کی خودمختاری اور علاقائی سالمیت کے احترام پر زور دیا گیا۔
شرکاء نے خطے میں کشیدگی میں کمی اور سفارتی حل کے لیے کوششیں جاری رکھنے پر اتفاق کیا۔ جہازوں کی آزاد آمدورفت اور عالمی سپلائی چین کے تحفظ کو یقینی بنانے پر بھی زور دیا گیا، جبکہ سعودی بحری دفاعی اتحاد کے قیام کے اقدام کو سراہا گیا۔
اس سے قبل مقبوضہ بیت المقدس سے متعلق وزارتی اجلاس کے موقع پر نائب وزیراعظم و وزیر خارجہ اسحاق ڈار نے ترکیہ، مصر، اردن اور صومالیہ کے وزرائے خارجہ سے الگ الگ ملاقاتیں کیں، جن میں دوطرفہ تعلقات، فلسطین اور خطے کی مجموعی صورتحال زیر بحث آئی۔ ان ملاقاتوں میں باہمی تعاون، قیام امن اور سفارتکاری کے فروغ پر اتفاق کیا گیا۔
دفتر خارجہ کے ترجمان کے مطابق اسحاق ڈار اور ترک وزیر خارجہ ہاکان فیدان نے باہمی دلچسپی کے امور کے ساتھ علاقائی اور بین الاقوامی صورتحال پر تبادلہ خیال کیا۔ مصری وزیر خارجہ بدر عبدالعاطی سے ملاقات میں بھی دونوں ممالک کے تعلقات اور خطے کی تازہ پیش رفت زیر غور آئی۔
اسحاق ڈار اور اردن کے وزیر خارجہ ایمن الصفدی نے سیاسی، دفاعی، اقتصادی، تعلیمی اور ثقافتی شعبوں میں تعاون مزید بڑھانے کے عزم کا اعادہ کیا۔ اسحاق ڈار نے فلسطینی عوام کے لیے اردن کی مسلسل حمایت کو سراہا۔ دونوں رہنماؤں نے کشیدگی میں کمی کے لیے مکالمے، سفارتکاری اور اقوام متحدہ سمیت بین الاقوامی فورمز پر قریبی رابطے برقرار رکھنے پر اتفاق کیا۔
اسحاق ڈار نے صومالیہ کے وزیر خارجہ عبدالسلام عبدی علی سے بھی ملاقات کی، جس میں دونوں ممالک کے دیرینہ برادرانہ تعلقات کا جائزہ لیا گیا۔ دونوں رہنماؤں نے باہمی دلچسپی کے شعبوں میں روابط کو مزید وسعت دینے اور کثیرالجہتی فورمز پر قریبی تعاون جاری رکھنے کے عزم کا اظہار کیا۔