محمد عباس نے بنگلادیش کے خلاف ٹیسٹ میں دو تاریخی سنگ میل عبور کر لیے
پاکستان کے تجربہ کار فاسٹ بولر محمد عباس نے بنگلادیش کے خلاف سلہٹ میں جاری دوسرے ٹیسٹ کے دوران دو اہم سنگ میل اپنے نام کر لیے۔
میزبان ٹیم کے کپتان نجم الحسن شنتو کو آؤٹ کرتے ہی محمد عباس نے بیرون ملک ٹیسٹ کرکٹ میں اپنی 100 وکٹیں مکمل کر لیں۔ 36 سالہ یہ بولر یہ سنگ میل عبور کرنے والے پاکستان کے چھٹے فاسٹ بولر بن گئے۔ ان سے پہلے یہ اعزاز عمران خان، وسیم اکرم، وقار یونس، عمر گل اور محمد عامر کے حصے میں آیا تھا۔
دلچسپ بات یہ ہے کہ بیرون ملک 100 سے زائد ٹیسٹ وکٹیں لینے والے پاکستانی بولرز میں محمد عباس کی بولنگ اوسط 23.02 سب سے کم اور سب سے بہتر ہے۔ مجموعی طور پر انہوں نے 51 اننگز میں 109 ٹیسٹ وکٹیں حاصل کی ہیں، جن میں سے صرف 9 پاکستان میں آئیں — باقی سب بیرون ملک۔