نائیجر: صحرائے صحارا میں ٹرک خراب، 50 مسافر پیاس سے جاں بحق — دو افراد پیدل بچ نکلے
نائیجر کے صحرائے صحارا میں ایک انتہائی دردناک واقعہ پیش آیا جب ٹرک خراب ہونے کے بعد پھنسے 50 افراد شدید گرمی میں پانی ختم ہو جانے سے جان کی بازی ہار گئے۔ یہ تمام مسافر عیدالاضحیٰ کی تعطیلات کے بعد مالی سے واپس اپنے گھروں کو لوٹ رہے تھے۔
غیر ملکی خبر ایجنسی کے مطابق راستے میں ٹرک اچانک خراب ہو گیا اور مسافر بے آب و گیاہ صحرا کے وسط میں پھنس کر رہ گئے۔ صحرائے صحارا کی جھلسا دینے والی گرمی میں پانی کا ذخیرہ تیزی سے ختم ہوا اور بروقت مدد نہ پہنچنے کے سبب ایک ایک کر کے 50 افراد دم توڑتے رہے۔
اس المناک واقعے میں صرف دو افراد زندہ بچ سکے۔ انہوں نے جان بچانے کے لیے پیدل ہی صحرا عبور کیا اور کسی طرح قریبی آبادی تک پہنچنے میں کامیاب ہوئے، جن کی اطلاع پر اس سانحے کا علم ہوا۔ صحرائے صحارا میں اس نوعیت کے حادثات غیر محفوظ سفری راستوں اور ناکافی انتظامات کے سنگین نتائج کی ایک اور یاد دہانی ہیں۔