لندن: انگلش ویمنز سپر لیگ میں آرسنل نے زبردست کارکردگی کا مظاہرہ کرتے ہوئے مانچسٹر سٹی کو ہوم گراؤنڈ پر 1-0 سے شکست دے دی، جس کے ساتھ ہی سٹی کا 13 میچز پر مشتمل مسلسل فتوحات کا سلسلہ ختم ہوگیا۔
ایمیریٹس اسٹیڈیم میں کھیلے گئے میچ میں آرسنل نے ابتدا ہی سے دباؤ برقرار رکھا اور 17ویں منٹ میں اولیویا اسمتھ نے شاندار گول کر کے ٹیم کو برتری دلائی۔ ماریونا کالڈینٹی کی دفاعی لائن کے بیچ شاندار پاس پر اولیویا اسمتھ نے رفتار کا فائدہ اٹھاتے ہوئے گول کیپر آیاقا یاماشیتا کو چکما دیا اور گیند خالی جال میں پہنچا دی۔
میچ کے بعد اولیویا اسمتھ کا کہنا تھا کہ وہ اس جیت پر بے حد خوش ہیں اور ٹیم نے فتح کے لیے بھرپور محنت کی۔
دوسرے ہاف میں مانچسٹر سٹی نے بہتر کھیل پیش کیا تاہم فیصلہ کن پاسز کی کمی کے باعث گول نہ کر سکی۔ 39 ہزار سے زائد شائقین کی موجودگی میں آرسنل نے مضبوط دفاع کے ذریعے برتری برقرار رکھی اور پوائنٹس ٹیبل پر تیسری پوزیشن حاصل کر لی۔
پوائنٹس ٹیبل پر مانچسٹر سٹی بدستور مانچسٹر یونائیٹڈ سے آٹھ پوائنٹس آگے ہے جبکہ آرسنل ایک میچ کم کھیل کر 10 پوائنٹس پیچھے ہے۔ چیلسی اگر ٹوٹنہم کے خلاف میچ جیت گئی تو تیسری پوزیشن واپس حاصل کر سکتی ہے۔
دوسری جانب لیورپول نے آسٹن ولا کو 1-4 سے شکست دے کر ٹیبل کے آخری نمبر سے جان چھڑا لی۔ میا اینڈربی، مارتھا تھامس، گریس فِسک اور اوریلی سیلاگ نے لیورپول کی جانب سے گول اسکور کیے۔
ایورٹن نے لندن سٹی لائنسیز کو 0-1 سے شکست دی، میچ میں گول کیپر کورٹنی بروسنان کو شاندار کارکردگی پر پلیئر آف دی میچ قرار دیا گیا۔
ویسٹ ہیم نے برائٹن کے خلاف شاندار کم بیک کرتے ہوئے آٹھ منٹ میں تین گول کر کے 2-3 سے کامیابی حاصل کی، جس کے بعد ویسٹ ہیم 10ویں پوزیشن پر پہنچ گئی جبکہ لیسٹر سٹی بدستور آخری نمبر پر موجود ہے۔