📍 کراچی
عارف حبیب گروپ کے کنسورشیم نے پاکستان انٹرنیشنل ائیرلائنز میں حکومت کے باقی ماندہ 25 فیصد حصص بھی خریدنے کا اعلان کر دیا ہے، جس کے بعد قومی فضائی کمپنی کا 100 فیصد اختیار نجی شعبے کے پاس آ جائے گا۔
عارف حبیب لمیٹڈ کے چیف ایگزیکٹو افسر شاہد علی حبیب کا کہنا ہے کہ پی آئی اے کے مکمل حصص کی خریداری کے بعد ایئرلائن سرکاری نامزد ارکان سے آزاد ہو جائے گی اور مکمل طور پر نجی بنیادوں پر آپریٹ کرے گی۔
ان کے مطابق کنسورشیم نے فیصلہ کر لیا ہے کہ اپریل میں حتمی منظوری کے بعد اگلے 12 ماہ میں 25 فیصد حصص کی ادائیگی مکمل کی جائے گی۔
واضح رہے کہ گزشتہ سال دسمبر میں کنسورشیم نے 135 ارب روپے کے عوض پی آئی اے کے 75 فیصد حصص حاصل کیے تھے۔ حکومت کی جانب سے نجکاری کا مقصد خسارے میں جانے والی قومی ایئرلائن کو تنظیمِ نو، بیڑے میں توسیع اور مسافروں کو بہتر سہولیات فراہم کر کے منافع بخش بنانا تھا۔
حکومتی پالیسی کے تحت باقی ماندہ 25 فیصد حصص کی مالیت تقریباً 45 ارب روپے بتائی گئی ہے، جن کی خریداری کی آخری تاریخ اپریل کے اختتام پر مقرر ہے۔
کامیاب کنسورشیم میں
فاطمہ فرٹیلائزر، فوجی فرٹیلائزر کمپنی، لیک سٹی، دی سٹی اسکول اور اے کے ڈی گروپ شامل ہیں۔
شاہد علی حبیب کے مطابق پی آئی اے کی بہتری کے منصوبے میں اسٹاف، ٹکٹنگ سسٹم، سروسز، سیفٹی اور سکیورٹی کو عالمی معیار کے مطابق بہتر بنانا شامل ہے۔