متحدہ عرب امارات کا تیل برآمدات دوگنا کرنے کا اعلان، نئی پائپ لائن 2027 تک مکمل ہوگی
ابوظبی: متحدہ عرب امارات نے فجیرہ بندرگاہ کے ذریعے تیل برآمدات دوگنا کرنے کے لیے ایک بڑے انفراسٹرکچر منصوبے کا اعلان کیا ہے۔
غیر ملکی میڈیا کے مطابق ابوظبی سے فجیرہ تک نئی آئل پائپ لائن کی تعمیر میں تیزی لائی جا رہی ہے۔ حکومت کو توقع ہے کہ یہ منصوبہ 2027 تک مکمل ہو جائے گا۔
ولی عہد شیخ خالد بن محمد بن زاید نے پائپ لائن منصوبے کو جلد از جلد مکمل کرنے کی ہدایت کی ہے۔ نئی لائن آبنائے ہرمز کو بائی پاس کرنے کا ایک اہم راستہ فراہم کرے گی، جسے علاقائی کشیدگی کے دوران تیل کی ترسیل کے لیے انتہائی حساس گزرگاہ سمجھا جاتا ہے۔
ابوظبی حکام کے مطابق موجودہ فجیرہ پائپ لائن روزانہ 18 لاکھ بیرل خام تیل سپلائی کی صلاحیت رکھتی ہے۔ نئی توسیع سے یہ گنجائش مزید بڑھ جائے گی اور امارات کی توانائی برآمدات کو ایک نیا محاذ ملے گا۔