سعودی عرب میں عازمین حج کی تعداد 15 لاکھ 18 ہزار سے تجاوز
رواں سال دنیا بھر سے حج کی سعادت حاصل کرنے آنے والوں کی تعداد 15 لاکھ 18 ہزار تک جا پہنچی ہے۔ یہ اعداد و شمار مکہ مکرمہ میں حج سکیورٹی فورسز کے کمانڈرز نے ایک پریس کانفرنس کے دوران سامنے رکھے۔
کمانڈرز نے بتایا کہ آنے والے عازمین میں سے 30 فیصد نے مکہ روٹ انیشی ایٹو کے ذریعے سفر مکمل کیا۔ یہ سہولت عازمین کو اپنے ملک سے ہی امیگریشن اور دیگر ضروری مراحل طے کر کے براہ راست مکہ پہنچنے کا موقع دیتی ہے۔ اس کے ساتھ ساتھ حجاج کی آمد، نقل و حرکت اور سکیورٹی کے انتظامات میں جدید ٹیکنالوجی سے بھی مدد لی جا رہی ہے۔
ادھر ذی الحج کے پہلے جمعے کو مسجد الحرام میں لاکھوں زائرین نے نماز جمعہ ادا کی۔ امام کعبہ شیخ ماہر المعیقلی نے اپنے خطبے میں ذی الحج کے ابتدائی دس دنوں کی روحانی اہمیت اور فضیلت بیان کی اور عازمین کو ان بابرکت لمحات سے بھرپور فائدہ اٹھانے کی تلقین کی۔