وزیراعلیٰ پنجاب مریم نواز نے عید الاضحیٰ کے موقع پر گلی محلوں اور ممنوعہ مقامات پر جانوروں کی آلائشیں پھینکنے والوں پر 50 ہزار روپے جرمانے کی منظوری دے دی ہے۔ یہ فیصلہ لاہور میں ان کی زیرصدارت ہونے والے ویڈیو لنک اجلاس میں کیا گیا، جس میں عید الاضحیٰ کے لیے فول پروف صفائی انتظامات کا مکمل منصوبہ ترتیب دیا گیا۔
اجلاس میں مریم نواز نے ہر شہر میں ڈرین، کینال اور دیگر مقامات کی خصوصی صفائی اور نگرانی کی ہدایات جاری کیں۔ انہوں نے پرائیویٹ ہاؤسنگ سوسائٹیوں، ریلوے کالونیوں اور کنٹونمنٹ ایریاز میں بھی صفائی ستھرائی یقینی بنانے کا حکم دیا۔ اس کے ساتھ صوبے بھر کی 2687 نمایاں کمرشل مارکیٹوں میں خصوصی صفائی مہم چلانے کی ہدایت بھی کی گئی۔
وزیراعلیٰ نے کہا کہ عید الاضحیٰ پر تمام ادارے ون گورنمنٹ یونٹ بن کر کام کریں گے۔ اعلیٰ کارکردگی پر انعام اور ستائش ہوگی جبکہ شکایت ثابت ہونے پر سزا بھی دی جائے گی۔ آلائشیں پھینکنے کی روک تھام کے لیے ویجلینس اسکواڈ قائم کیے گئے ہیں اور عوامی آگاہی کے لیے ابلاغ عامہ کی مہم بھی چلائی جائے گی۔
اجلاس میں بریفنگ دی گئی کہ نماز عید کے اجتماعات اور مساجد میں عرق گلاب کا اسپرے کیا جائے گا۔ آلائشوں کے لیے ڈی گریڈ ایبل شاپنگ بیگ مہیا کیے جائیں گے۔ صوبے بھر میں 3800 پرائمری کلیکشن سینٹرز اور 3100 ڈمپنگ سائٹس مقرر کی گئی ہیں جبکہ آلائشوں کو تلف کرنے کے لیے 7 ہزار ڈمپنگ پوائنٹس بھی قائم کیے جائیں گے۔
ستھرا پنجاب عید آپریشن میں 1 لاکھ 76 ہزار سینیٹری ورکرز اور 8 ہزار سے زائد عارضی کارکن حصہ لیں گے۔ صوبے بھر میں 4500 خصوصی کیمپ لگائے جائیں گے اور لوڈر رکشہ، منی ڈمپر، ٹریکٹر ٹرالی سمیت 40 ہزار سے زائد اضافی گاڑیاں استعمال کی جائیں گی۔
شہری صفائی سے متعلق شکایات ستھرا پنجاب کی ہیلپ لائن نمبر 1139 پر درج کروا سکتے ہیں۔ حکومت کی جانب سے اپیل کی گئی ہے کہ عوام آلائشوں کو مقررہ مقامات پر ڈالیں اور صوبے کو صاف رکھنے میں حکومت کا ہاتھ بٹائیں۔