غزہ پر اسرائیلی بمباری جاری، رہائشی عمارتیں نشانہ، معصوم بچے بھی جانوں سے ہاتھ دھو بیٹھے

غزہ میں اسرائیلی فضائی حملے، 4 بچوں سمیت 9 فلسطینی شہید

غزہ سٹی میں اسرائیلی فوج کے فضائی حملوں میں 9 فلسطینی شہید اور متعدد زخمی ہوگئے۔ شہید ہونے والوں میں 4 معصوم بچے بھی شامل ہیں۔

فلسطینی سول ڈیفنس کے ترجمان محمود بصل نے بتایا کہ علی الصبح ہونے والے یہ حملے رہائشی عمارتوں پر کیے گئے۔ الشاطی پناہ گزین کیمپ بھی اس بمباری سے محفوظ نہ رہا، جہاں ایک اور فلسطینی شہید ہوا۔

سول ڈیفنس کے مطابق حملوں میں جاں بحق ہونے والوں کے علاوہ کئی افراد زخمی بھی ہوئے، جنھیں قریبی طبی مراکز منتقل کیا گیا۔

فلسطینی حکومت کے میڈیا آفس نے بتایا کہ گزشتہ سال اکتوبر میں جنگ بندی نافذ ہونے کے بعد سے اسرائیل کی طرف سے تین ہزار سے زائد مرتبہ جنگ بندی کی خلاف ورزی کی جا چکی ہے۔ ان خلاف ورزیوں کے نتیجے میں 900 فلسطینی شہید اور دو ہزار سے زائد زخمی ہو چکے ہیں۔

غزہ میں انسانی بحران مسلسل گہرا ہوتا جا رہا ہے جبکہ بین الاقوامی برادری کی طرف سے جنگ بندی کے تحفظ کے مطالبات بھی بے اثر ثابت ہو رہے ہیں۔