گرمیوں میں توانائی بچانے کے لیے پنجاب اور بلوچستان میں کاروباری مراکز کے اوقات محدود

پنجاب اور بلوچستان میں کاروباری مراکز کے نئے اوقات کار نافذ، دکانیں رات 9 بجے بند ہوں گی

پنجاب حکومت نے گرمیوں میں دن کا دورانیہ اور درجہ حرارت بڑھنے کے پیش نظر صوبے میں کاروباری مراکز کے نئے اوقات کار مقرر کردیے ہیں جو فوری طور پر نافذ العمل ہوں گے۔

چیف سیکرٹری پنجاب کی جانب سے جاری نوٹیفکیشن کے مطابق دکانیں، بازار، شاپنگ مالز، ڈپارٹمنٹل اور کریانہ اسٹورز رات 9 بجے بند کیے جائیں گے۔ شادی ہالز، مارکیز اور تقریبات کے مقامات کے لیے رات 10 بجے تک کا وقت مقرر کیا گیا ہے، جبکہ ریسٹورینٹس، سنیما گھر، فوڈ آؤٹ لیٹس اور پھل و سبزی کی دکانیں رات 11 بجے تک کھلی رہ سکیں گی۔

ٹیک اوے اور ہوم ڈیلیوری سروسز کو ان اوقات سے مستثنیٰ قرار دیا گیا ہے۔ میڈیکل اسٹورز، لیبارٹریز، کلینکس اور اسپتال بھی نئے اوقات کار کی پابندی سے باہر ہیں۔ اسی طرح بیکریاں، تندور، دودھ اور ڈیری شاپس، پیٹرول پمپ، سی این جی اسٹیشن اور الیکٹرک گاڑیوں کے چارجنگ اسٹیشن بھی اس ضابطے کے دائرے میں نہیں آتے۔

جم، کھیلوں کی سہولیات، آئی ٹی کمپنیاں اور کال سینٹرز بھی نئے اوقات کار سے مستثنیٰ ہیں۔ تمام ڈویژنل کمشنرز، ڈپٹی کمشنرز اور متعلقہ اداروں کو ہدایت کی گئی ہے کہ نوٹیفکیشن پر سختی سے عملدرآمد یقینی بنایا جائے۔

دوسری جانب بلوچستان حکومت نے بھی وفاقی حکومت کی ہدایات کی روشنی میں اسی نوعیت کا نوٹیفکیشن جاری کردیا ہے۔ محکمہ نظم و نسق کے مطابق صوبے میں دکانیں، مارکیٹس، شاپنگ مالز اور اسٹورز رات 9 بجے جبکہ شادی ہالز، مارکیز اور دیگر تجارتی مراکز رات 10 بجے بند ہوں گے۔ ریسٹورینٹس، کیفے اور پھل و سبزی کی دکانیں رات 11 بجے تک کاروبار کرسکیں گی۔ میڈیکل اسٹورز، اسپتال، لیبارٹریز، سی این جی اسٹیشن اور پیٹرول پمپ بلوچستان میں بھی اس پابندی سے مستثنیٰ رہیں گے۔