آٹے کی قیمتوں میں اضافہ، کراچی میں 20 کلو تھیلہ 2800 روپے کا
ملک بھر میں آٹے کی قیمتیں ایک بار پھر بڑھ گئی ہیں اور کراچی کے شہری سب سے زیادہ مہنگا آٹا خریدنے پر مجبور ہیں۔ ادارہ شماریات کی دستاویز کے مطابق کراچی میں 20 کلو آٹے کے تھیلے کی قیمت 2800 روپے تک پہنچ گئی ہے، جو ملک کے کسی بھی بڑے شہر میں سب سے زیادہ ہے۔
شمالی شہروں میں بھی صورت حال مختلف نہیں۔ پشاور میں یہ تھیلہ 2750 روپے تک فروخت ہو رہا ہے، جبکہ اسلام آباد میں قیمت 2733 روپے اور راولپنڈی میں 2707 روپے تک ہے۔ کوئٹہ اور بنوں میں 20 کلو آٹے کی قیمت 2700 روپے ریکارڈ کی گئی ہے۔
درمیانے درجے کے شہروں میں حیدرآباد میں یہ تھیلہ 2600 روپے کا ہے، خضدار اور لاڑکانہ میں 2400 روپے، اور فیصل آباد میں 2350 روپے تک قیمت رہی۔ گوجرانوالہ میں 2333 روپے اور ملتان میں 2267 روپے میں آٹا دستیاب ہے۔
لاہور ان تمام شہروں میں سستا ترین ہے جہاں 20 کلو آٹے کا تھیلہ 2250 روپے میں فروخت ہو رہا ہے۔ تاہم ماہرین کا کہنا ہے کہ مختلف شہروں میں قیمتوں کا یہ فرق نقل و حمل کے اخراجات، مقامی سپلائی چین اور ذخیرہ اندوزی سمیت کئی عوامل کا نتیجہ ہے۔