منداناؤ میں زمین کانپ اٹھی، 32 جانیں گئیں، ہزاروں بے گھر
فلپائن کے جنوبی علاقے میں 7.8 شدت کے شدید زلزلے نے تباہی پھیلا دی۔ جزیرہ منداناؤ کے قریب مقامی وقت کے مطابق صبح سات بج کر چالیس منٹ کے قریب آنے والے اس زلزلے میں 32 افراد جاں بحق اور سو سے زائد زخمی ہوگئے ہیں۔
زلزلے کی گہرائی تقریباً دس کلومیٹر ریکارڈ کی گئی، جس کی وجہ سے زمین کی سطح پر جھٹکے انتہائی شدید محسوس ہوئے۔ لوگ خوف کے مارے گھروں، دفاتر اور اسکولوں سے نکل کر کھلی جگہوں پر آگئے۔ متعدد عمارتیں شدید نقصان سے دوچار ہوئیں اور بعض ڈھانچے مکمل طور پر منہدم ہوگئے۔
فلپائنی حکام نے فوری ریسکیو آپریشن شروع کرتے ہوئے متاثرہ علاقوں سے دس ہزار سے زائد افراد کو محفوظ مقامات پر منتقل کیا۔ زلزلے کے فوری بعد ایشیا کے کئی ساحلی علاقوں میں سونامی کی وارننگ جاری کی گئی، تاہم کچھ وقت بعد اسے واپس لے لیا گیا۔
فلپائن زلزلوں اور قدرتی آفات کے لحاظ سے دنیا کے حساس ترین خطوں میں شمار ہوتا ہے اور یہاں اس نوعیت کے جھٹکے معمول کا حصہ ہیں، مگر 7.8 شدت کا زلزلہ غیر معمولی تباہ کاری کی صلاحیت رکھتا ہے۔ ہلاکتوں اور نقصانات کی تعداد میں مزید اضافے کا خدشہ ہے کیونکہ دور دراز علاقوں سے ابھی مکمل اطلاعات موصول ہونا باقی ہیں۔