بجٹ 2026-27: صحت کے شعبے کے لیے 25.1 ارب روپے مختص کرنے کی تجویز
اسلام آباد: وفاقی ترقیاتی پروگرام 2026-27 کے تحت عوامی صحت کی دیکھ بھال کو ایک اہم قومی ترجیح قرار دیا گیا ہے۔ اس کے تحت آئندہ مالی سال کے بجٹ میں صحت کے شعبے کے لیے 25.1 ارب روپے مختص کرنے کی تجویز دی گئی ہے۔
حکومتی دستاویز کے مطابق اس فنڈنگ کا بڑا حصہ ملک بھر میں ٹرشری ہیلتھ کیئر سہولیات کو وسعت دینے پر خرچ ہوگا۔ اس کے علاوہ ہنگامی اور کریٹیکل کیئر کے نظام کو مضبوط بنانے کے ساتھ ساتھ کینسر کے علاج کی جدید سہولیات کو بہتر کرنے پر بھی توجہ دی جائے گی۔
پروگرام میں بیماریوں کی نگرانی کے مربوط نظام کو بہتر بنانے کو بھی شامل کیا گیا ہے، جس سے وبائی امراض پر بروقت نظر رکھنا ممکن ہوگا۔ اس کے ساتھ تشخیصی اور ریگولیٹری ڈھانچے کی جدید کاری بھی ترجیحات کا حصہ ہے۔
حکام کا کہنا ہے کہ ان اقدامات کا مقصد صحت کے شعبے میں مجموعی کارکردگی کو بہتر بنانا اور عوام کے لیے صحت کی سہولیات تک رسائی کو آسان بنانا ہے۔