خیبرپختونخوا میں سیکیورٹی فورسز کے متعدد آپریشن، 21 خارجی ہلاک
خیبرپختونخوا کے ضلع شمالی وزیرستان میں سیکیورٹی فورسز نے متعدد آپریشنز کے دوران 21 خارجیوں کو ہلاک کر دیا ہے۔ آئی ایس پی آر کے مطابق یہ کارروائیاں میران شاہ اور اس سے ملحقہ حساس علاقوں میں انٹیلی جنس بنیادوں پر کی گئیں، جہاں دہشتگردوں کی موجودگی کی مصدقہ اطلاعات موجود تھیں۔
ہلاک ہونے والوں میں چار اہم رنگ لیڈر بھی شامل ہیں، جنہیں نیٹ ورک کی ریڑھ کی ہڈی قرار دیا جا رہا تھا۔ ان کی شناخت خالد رضا عرف سالار، مفتون، موسیٰ اور عمران عرف آیان کے نام سے کی گئی ہے۔ آئی ایس پی آر کا کہنا ہے کہ یہ عناصر ماضی میں متعدد تخریبی کارروائیوں میں براہ راست ملوث رہے اور علاقے میں بدامنی کا نیٹ ورک منظم کر رہے تھے۔
اس آپریشن کے بعد شمالی وزیرستان کے اس علاقے میں مارے جانے والے خارجیوں کی مجموعی تعداد 48 تک پہنچ گئی ہے۔ کارروائی کے دوران بھاری مقدار میں اسلحہ اور گولہ بارود بھی برآمد کیا گیا۔ آئی ایس پی آر کے مطابق علاقے میں کلیئرنس اور سینیٹائزیشن آپریشن جاری ہے تاکہ کسی بھی باقی ماندہ خطرے کو مکمل طور پر ختم کیا جا سکے۔