پاکستان اور بھارت کے درمیان قیدیوں کی فہرستوں کا تبادلہ
اسلام آباد: پاکستان اور بھارت کے درمیان قیدیوں کی فہرستوں کا تبادلہ کر لیا گیا ہے۔
سفارتی ذرائع کے مطابق پاکستان نے بھارت کو 715 قیدیوں پر مشتمل فہرست تیار کر کے دی، جن میں 409 سویلین اور 306 مچھیرے شامل ہیں۔ یہ فہرست دونوں ممالک کے درمیان طے شدہ طریقہ کار کے تحت باقاعدہ سفارتی چینلز کے ذریعے مکمل کی گئی۔
ذرائع نے بتایا کہ نئی دہلی میں پاکستانی مشن کے سربراہ سعد وڑائچ نے فہرست بھارتی حکام کے حوالے کی، جبکہ پاکستان میں بھارتی مشن کی سربراہ گیتیکا شریواستو نے قیدیوں کی فہرست پاکستانی حکام کو دی۔ دونوں ممالک نے یہ عمل ایک ہی روز مکمل کیا، جو دو طرفہ رابطوں میں تسلسل کی نشاندہی کرتا ہے۔
پاکستان اور بھارت کے درمیان قونصلر رسائی معاہدہ 2008ء سے نافذ ہے، جس کے تحت دونوں ممالک سال میں دو بار اپنی حراست میں موجود دوسرے ملک کے شہریوں کی فہرستیں ایک دوسرے کے ساتھ شیئر کرنے کے پابند ہیں۔ اس معاہدے کا مقصد قیدیوں کے حقوق کا تحفظ اور ان کی رہائی کے عمل کو آسان بنانا ہے۔