کارگل جنگ کے ہیرو کیپٹن کرنل شیر خان شہید کی 27ویں برسی، وزیراعظم کا خراج عقیدت
کارگل جنگ کے ہیرو کیپٹن کرنل شیر خان شہید نشان حیدر کی آج 27ویں برسی منائی جا رہی ہے۔ وہ 5 جولائی 1999 کو کارگل کے محاذ پر دشمن کے خلاف لڑتے ہوئے جام شہادت نوش کر گئے تھے۔ ان کی جرأت اور بہادری کو آج بھی پوری قوم سلام پیش کرتی ہے۔
برسی کے موقع پر صبح شہید کے مزار پر پھولوں کی چادر چڑھائی گئی، جہاں پاک فوج کے چاک و چوبند دستے نے سلامی بھی پیش کی۔ اس موقع پر بڑی تعداد میں لوگ شہید کو خراج عقیدت پیش کرنے کے لیے پہنچے۔
وزیراعظم شہباز شریف نے بھی کرنل شیر خان شہید کی برسی پر انہیں خراج عقیدت پیش کیا۔ ان کا کہنا تھا کہ کیپٹن کرنل شیر خان شہید کی لازوال قربانی پاکستان کی عسکری تاریخ کا درخشاں باب ہے اور یہ قربانی مادر وطن سے وفاداری اور شجاعت کی اعلیٰ ترین روایات کا منہ بولتا ثبوت ہے۔
وزیراعظم نے کہا کہ کیپٹن کرنل شیر خان شہید کی عظیم قربانی ہمیں یاد دلاتی ہے کہ ہماری آزادی اور خودمختاری ہمارے شہداء کے مقدس خون کی مرہون منت ہے۔ انہوں نے کہا کہ قوم بیرونی یا اندرونی کسی بھی خطرے کے خلاف اپنی مسلح افواج کے ساتھ شانہ بشانہ کھڑی ہے۔