ایران کے کویت اور بحرین پر نئے حملے، دبئی میں دھماکوں کی آوازیں سنی گئیں
کویت اور بحرین کی افواج کے مطابق جمعرات کو دونوں ممالک ایک بار پھر ایرانی فضائی حملوں کی زد میں آئے۔ اسی دوران دبئی کے وسطی علاقے میں بھی دھماکوں کی آوازیں سنی گئیں، جس سے خطے میں کشیدگی مزید بڑھ گئی ہے۔
یہ حملے آبنائے ہرمز کے کنٹرول پر جاری تنازع کا حصہ ہیں، جہاں ایران اور امریکہ کے درمیان حملوں کا تبادلہ کئی روز سے جاری ہے۔ امریکی افواج نے جنوبی ایران میں بندر عباس اور قیشم جزیرے پر میزائیل حملے کیے، جس کے بعد ایرانی وزیر خارجہ عباس عراقچی نے الزام لگایا کہ امریکہ ایران میں جنگی جرائم کا مرتکب ہو رہا ہے۔
کویتی فوج نے بتایا کہ اس نے ڈرون حملوں کی ایک نئی لہر ناکام بنائی، جسے اس نے ایرانی جارحیت قرار دیا۔ کویت کے دارالحکومت کے قریب بھی دھماکوں کی آوازیں سنائی دیں۔ ایک عالمی خبررساں ایجنسی کے مطابق دبئی کے وسطی حصے میں بھی ایسی ہی صورتحال دیکھی گئی۔
ایرانی حکام کا دعویٰ ہے کہ ان کی افواج نے کویت کے علی السالم فضائی اڈے پر ریڈار نظام، فضائی دفاعی نظام اور ایندھن ذخیرہ کرنے کی تنصیبات کو نشانہ بنایا۔ تہران کے مطابق بحرین میں شیخ عیسیٰ ایئر بیس پر موجود امریکی فوجی تنصیبات پر بھی حملہ کیا گیا۔
صورتحال تاحال کشیدہ ہے اور فریقین کی جانب سے کسی جنگ بندی کا اعلان سامنے نہیں آیا۔