امریکا کے مسلسل ساتویں رات ایران پر فضائی حملے، تین مزید افراد جاں بحق
امریکا نے مسلسل ساتویں رات بھی ایران پر فضائی حملوں کا سلسلہ جاری رکھا۔ یزد شہر دھماکوں سے گونج اٹھا جبکہ اہواز، لار، بندرعباس، سیریک، جزیرہ قشم اور امیدیہ سمیت کئی علاقوں کو نشانہ بنایا گیا۔
ہرمزگان صوبے میں تازہ حملوں کے نتیجے میں تین افراد جاں بحق اور آٹھ زخمی ہو گئے۔ رپورٹس کے مطابق امریکی فوج نے تین پلوں اور اہم سرنگوں کو بھی نشانہ بنایا، جس کے باعث صوبے کی متعدد شاہراہیں اور رابطہ سڑکیں بند کرنا پڑیں۔
امریکی سینٹ کام کا کہنا ہے کہ آبنائے ہرمز کی ناکہ بندی بدستور برقرار ہے اور حالیہ کارروائیوں کا مقصد ایران کی فوجی صلاحیتوں کو مزید کمزور کرنا ہے۔
ایرانی وزارتِ صحت کے مطابق 16 جولائی کی صبح ساڑھے چھ بجے تک امریکی حملوں میں جاں بحق ہونے والوں کی تعداد 38 تک پہنچ چکی ہے، جبکہ زخمیوں کی تعداد 400 سے تجاوز کر گئی ہے۔