سلامتی کے شعبے میں ٹیکنالوجی کا استعمال قابل فخر ہے، وزیراعظم شہباز شریف
وزیراعظم شہباز شریف نے کہا ہے کہ سلامتی کے شعبے میں جدید ٹیکنالوجی کا استعمال قابل فخر ہے اور پاکستان نے اس میدان میں اہم کامیابیاں حاصل کی ہیں۔
اسلام آباد میں ایک تقریب سے خطاب کرتے ہوئے وزیراعظم نے کہا کہ روبوٹکس اور ڈرون ٹیکنالوجی میں جدت سے معیشت مضبوط ہو رہی ہے اور عوام کی زندگی آسان ہو رہی ہے۔ ان کا کہنا تھا کہ آج مشینیں محسوس کرتی ہیں اور خود فیصلے کرنے کی صلاحیت رکھتی ہیں، جو ٹیکنالوجی کی جدید ترین شکل ہے۔
وزیراعظم نے کہا کہ حالیہ معرکہ حق میں افواج پاکستان نے اٹانومس سسٹمز اور سائبرسیکیورٹی کے ذریعے سرحدوں کا مؤثر دفاع کیا۔ انہوں نے واضح کیا کہ پاکستان اپنی خودمختاری کے تحفظ کے لیے جدید ٹیکنالوجی کا استعمال جاری رکھے گا۔
وزیراعظم شہباز شریف نے بتایا کہ فیلڈ مارشل عاصم منیر کی قیادت میں مسلح افواج نے جدید ٹیکنالوجی کو تیزی سے اپنایا ہے، جس کے نتیجے میں ملک میں تیار ہونے والے ڈرونز کی شرح 60 فیصد سے تجاوز کر چکی ہے۔
انہوں نے انڈس روبوٹکس اینڈ آٹونومس سسٹم ایکسپو میں شرکت کو باعث مسرت قرار دیا اور کہا کہ روبوٹکس اور ڈرون ٹیکنالوجی میں جدت سے معیشت مضبوط ہوگی، سلامتی بہتر ہوگی اور عوام کی زندگی مزید آسان ہوگی۔