خیبرپختونخوا میں سیکیورٹی فورسز کی کارروائیاں، 10 دہشت گرد ہلاک
سیکیورٹی فورسز نے خیبرپختونخوا میں دو مختلف کارروائیوں میں فتنۃ الخوارج سے تعلق رکھنے والے 10 دہشت گردوں کو ہلاک کر دیا۔
پاک فوج کے شعبہ تعلقات عامہ (آئی ایس پی آر) کے مطابق صوبے میں دہشت گردوں کے خلاف دو الگ آپریشنز کے دوران بھارتی سرپرستی میں سرگرم فتنۃ الخوارج کے دہشت گردوں کو نشانہ بنایا گیا۔
ترجمان نے بتایا کہ پہلی کارروائی 6 اگست کو جنوبی وزیرستان کے علاقے اعظم ورسک میں کی گئی، جہاں دہشت گردوں نے سیکیورٹی فورسز کی چیک پوسٹوں پر حملے کی کوشش کی۔ فورسز نے بروقت جوابی کارروائی کرتے ہوئے حملہ ناکام بنا دیا اور شدید فائرنگ کے تبادلے میں 8 دہشت گرد مارے گئے۔
دوسری کارروائی ضلع دیر میں کی گئی، جہاں فورسز نے مزید 2 دہشت گردوں کو ہلاک کیا۔ اس طرح دونوں کارروائیوں میں مجموعی طور پر 10 دہشت گرد ہلاک ہوئے۔
آئی ایس پی آر کے بیان کے مطابق ہلاک ہونے والے دہشت گردوں کے قبضے سے اسلحہ اور بھاری مقدار میں گولہ بارود بھی برآمد ہوا ہے۔ سیکیورٹی حکام کا کہنا ہے کہ یہ عناصر علاقے میں مختلف دہشت گرد کارروائیوں میں ملوث رہے تھے۔