بھارتی یومِ آزادی کے موقع پر مقبوضہ کشمیر میں یومِ سیاہ، سری نگر سخت سیکیورٹی میں
بھارت کے یومِ آزادی پر آج مقبوضہ کشمیر میں یومِ سیاہ منایا جا رہا ہے۔ کل جماعتی حریت کانفرنس کی اپیل پر کنٹرول لائن کے دونوں جانب اور دنیا بھر میں کشمیری بھارتی قبضے کے خلاف احتجاج کر رہے ہیں۔
کشمیر میڈیا سروس کے مطابق حریت کانفرنس کی کال کو تمام آزادی پسند رہنماؤں اور تنظیموں کی مکمل حمایت حاصل ہے۔ دنیا بھر میں مقیم کشمیری بھارت مخالف مظاہروں کے ذریعے مقبوضہ وادی میں جاری بھارتی مظالم کی جانب عالمی برادری کی توجہ مبذول کرا رہے ہیں۔ کئی ممالک میں کشمیری تنظیموں نے ریلیوں اور احتجاجی مظاہروں کا اہتمام کیا ہے۔
دوسری جانب قابض بھارتی انتظامیہ نے یومِ آزادی کے موقع پر مقبوضہ وادی، خصوصاً سری نگر کو سخت سیکیورٹی حصار میں لے لیا ہے۔ بخشی اسٹیڈیم کے اطراف کئی سطحوں پر فورسز تعینات کر دی گئی ہیں، جبکہ گاڑیوں، مسافروں اور راہگیروں کی سخت تلاشی لی جا رہی ہے۔ شہر کے حساس علاقوں میں اضافی چیک پوسٹیں قائم کی گئی ہیں اور نقل و حرکت پر کڑی نظر رکھی جا رہی ہے۔
مقامی صحافیوں اور شہریوں کے مطابق سیکیورٹی کے سخت انتظامات کے باعث معمولاتِ زندگی متاثر ہو رہے ہیں، جبکہ حریت رہنماؤں نے عالمی برادری سے مسئلہ کشمیر کے حل کے لیے مؤثر کردار ادا کرنے کا مطالبہ دہرایا ہے۔