راولپنڈی: چیف آف ڈیفنس فورسز آرمی چیف فیلڈ مارشل سید عاصم منیر سے انڈر 19 ایشیا کپ کے فائنل میں بھارت کو شکست دینے والی پاکستان انڈر 19 ٹیم نے ملاقات کی جس میں فیلڈ مارشل نے اس کامیابی کو پوری قوم کیلئے باعثِ فخر قرار دیا۔
پاک فوج کے شعبہ تعلقات عامہ( آئی ایس پی آر) کے مطابق چیف آف ڈیفنس فورسز آرمی چیف فیلڈ مارشل سید عاصم منیر سے جی ایچ کیو میں پاکستان انڈر19 کرکٹ ٹیم نے ملاقات کی۔
آئی ایس پی آر کے مطابق فیلڈ مارشل نے ایشیا کپ انڈر 19 جیتنے پر کھلاڑیوں، ٹیم مینجمنٹ اور آفیشلز کو مبارکباد دی اور ٹیم کے نظم و ضبط، باہمی تعاون اور جرات مندانہ کھیل کو سراہا۔
فیلڈ مارشل سید عاصم منیر نے کامیابی کو پوری قوم کے لیے باعثِ فخر قرار دیا اور کھلاڑیوں کو مسلسل اعلیٰ کارکردگی کے لیے کوشاں رہنے کی تلقین کی۔
آئی ایس پی آر کے مطابق فیلڈ مارشل نے کہا کہ کھلاڑی پیشہ ورانہ معیار برقرار رکھیں اور میدان کے اندر اور باہرملک کے سفیر بن کر رہیں۔
فیلڈ مارشل نے مزید کہاکہ پاکستان کے نوجوان ہی قوم کے مستقبل کی بنیاد ہیں۔ نوجوانوں کی توانائی، صلاحیت اور کردار ملک کی ترقی اورعالمی سطح پر اس کے وقار کی تشکیل کریں گے۔
آئی ایس پی آر کے مطابق قومی انڈر 19 کرکٹ ٹیم نے حوصلہ افزائی اور سرپرستی پر فیلڈ مارشل کا شکریہ ادا کرتے ہوئے کہا کہ اس اعزاز سے مزید محنت اور بہتر کارکردگی کے لیے زبردست حوصلہ ملا ہے۔
