ابوظبی میں رہائشی اور کمرشل کرایوں میں اضافے پر پابندی عائد
متحدہ عرب امارات کی ریاست ابوظبی میں حکام نے رہائشی اور کمرشل دونوں طرح کے کرایوں میں اضافے پر عارضی پابندی لگادی ہے۔ خلیجی میڈیا کے مطابق یہ پابندی فوری طور پر نافذ ہوگئی ہے اور تاحکم ثانی برقرار رہے گی۔
حکام کی جانب سے واضح کیا گیا ہے کہ نئے کرایہ داری معاہدوں کے ساتھ ساتھ تجدید شدہ معاہدوں پر بھی کرایہ نہیں بڑھایا جاسکے گا۔ موجودہ طے شدہ رقم سے زیادہ وصول کرنا ممنوع قرار دیا گیا ہے اور کسی بھی قسم کا اضافہ اس پابندی کی خلاف ورزی تصور ہوگا۔
یہ پہلی مرتبہ نہیں کہ ابوظبی نے ایسا قدم اٹھایا ہو۔ 2021 میں کورونا وبا کے دوران بھی حکومت نے کاروباری اداروں کو ریلیف دینے کی خاطر تمام کمرشل کمپنیوں کے کرائے منجمد کردیے تھے، جس کا مقصد معیشت کو سنبھالا دینا تھا۔
موجودہ اقدام کو بھی عوام اور کاروباری طبقے کے لیے ایک اہم ریلیف کے طور پر دیکھا جارہا ہے، خاص طور پر ایسے وقت میں جب خطے میں رہائشی اخراجات میں مسلسل اضافے کی شکایات سامنے آرہی تھیں۔