سوریا کمار یادیو کو ٹی ٹوئنٹی کپتانی سے ہٹانے کا فیصلہ، شریاس ائیر نئے کپتان کے امیدوار
بھارتی کرکٹ بورڈ نے ٹی ٹوئنٹی ورلڈکپ فاتح کپتان سوریا کمار یادیو کو قومی ٹیم کی قیادت سے ہٹانے کا فیصلہ کرلیا ہے۔
بھارتی میڈیا رپورٹس کے مطابق حتمی اعلان سے پہلے ہیڈ کوچ گوتم گمبھیر سے مشاورت کی جائے گی، تاہم یہ عمل کچھ وقت لے سکتا ہے۔
سلیکٹرز اس وقت طویل المدتی منصوبہ بندی پر توجہ دے رہے ہیں۔ ان کی ترجیح ایسا کپتان چننا ہے جو آئندہ دو ٹی ٹوئنٹی ورلڈکپ تک ٹیم کی رہنمائی کر سکے۔
اس حوالے سے شریاس ائیر کا نام سب سے نمایاں ہے۔ بھارتی میڈیا کے مطابق انہیں ٹی ٹوئنٹی کپتانی سونپے جانے کا قوی امکان ہے، جبکہ تلک ورما کو اکشر پٹیل کی جگہ نائب کپتان بنائے جانے کی بھی توقع ہے۔
سوریا کمار یادیو نے گزشتہ سال بھارت کو ٹی ٹوئنٹی ورلڈکپ جتوایا تھا، لیکن بطور بلے باز ان کی کارکردگی مسلسل سوالوں کی زد میں رہی۔ آئی پی ایل 2026 میں بھی وہ اپنا لوہا منوانے میں ناکام رہے — ممبئی انڈینز کی جانب سے 13 میچوں میں محض 270 رنز بنا سکے اور ان کی ٹیم پوائنٹس ٹیبل پر نویں نمبر پر رہی۔
اب بھارتی کرکٹ ایک نئے باب میں داخل ہونے کی تیاری میں ہے۔
