لکی مروت:
خیبر پختونخوا کے ضلع لکی مروت میں دہشتگردی کا واقعہ پیش آیا ہے، جہاں ناورخیل موڑ کے قریب دہشتگردوں نے حملہ کر دیا۔ پولیس کے مطابق حملے کے دوران دھماکا ہوا جس کے نتیجے میں متعدد افراد زخمی ہو گئے۔
پولیس کا کہنا ہے کہ حملہ آوروں نے ایک نجی سیمنٹ فیکٹری کی گاڑی کو نشانہ بنایا۔ دھماکے کی شدت کے باعث گاڑی کو نقصان پہنچا جبکہ موقع پر موجود افراد زخمی ہو گئے۔
ریسکیو اور پولیس حکام کے مطابق زخمیوں کو فوری طور پر قریبی اسپتال منتقل کیا گیا، جن میں سے 10 زخمیوں کو سٹی اسپتال لکی مروت لایا گیا ہے۔ اسپتال ذرائع کے مطابق تمام زخمیوں کو طبی امداد فراہم کی جا رہی ہے اور ان کی حالت خطرے سے باہر بتائی جا رہی ہے۔
پولیس نے واقعے کے بعد علاقے کو گھیرے میں لے کر تحقیقات کا آغاز کر دیا ہے جبکہ ممکنہ خطرات کے پیش نظر سیکیورٹی مزید سخت کر دی گئی ہے۔ واقعے کی نوعیت اور ذمہ داروں کے تعین کے لیے شواہد اکٹھے کیے جا رہے ہیں۔