نیویارک: کھلے مین ہول میں گرنے سے 56 سالہ خاتون جاں بحق
نیویارک کی ایک مصروف سڑک پر اس وقت افسوسناک واقعہ پیش آیا جب 56 سالہ خاتون کھلے مین ہول میں گر گئیں اور بعد ازاں اسپتال میں دم توڑ گئیں۔
نیویارک پولیس ڈیپارٹمنٹ کے مطابق اہلکاروں نے خاتون کو مین ہول کے اندر بے ہوش اور غیر متحرک حالت میں دریافت کیا۔ انہیں فوری طور پر قریبی اسپتال منتقل کیا گیا، جہاں ڈاکٹروں نے انہیں مردہ قرار دے دیا۔ ابھی تک اس واقعے میں کوئی گرفتاری نہیں ہوئی اور تحقیقات کا سلسلہ جاری ہے۔
امریکی میڈیا کے مطابق جائے وقوعہ کی سی سی ٹی وی فوٹیج میں ایک سیاہ گاڑی سڑک کنارے کھڑی نظر آ رہی ہے، جس کا ڈرائیور سائیڈ کا دروازہ عین اسی مین ہول کے قریب تھا — تاہم گاڑی اور اس کے ڈرائیور کا واقعے سے کوئی براہِ راست تعلق ابھی ثابت نہیں ہوا۔
نیویارک کی توانائی کمپنی کون ایڈیسن نے اس بات کی تحقیقات شروع کر دی ہیں کہ مین ہول کا ڈھکن آخر تھا کہاں۔ کمپنی کے ترجمان نے اس سانحے پر افسوس کا اظہار کرتے ہوئے کہا کہ ایک شہری کی اس طرح جان جانا انتہائی دردناک ہے۔
یہ واقعہ ایک بار پھر نیویارک جیسے بڑے شہر میں سڑکوں کی حفاظت اور بنیادی ڈھانچے کی نگہداشت پر سوال اٹھا گیا ہے۔ شہری حلقوں میں یہ مطالبہ زور پکڑ رہا ہے کہ اس طرح کے حادثات روکنے کے لیے فوری اور مؤثر اقدامات کیے جائیں۔